နိုင်နိုင်းနှင့်တွေ့ဆုံခြင်း

“ကျွန်တော့်မြန်နှုန်းက ဖြည်းဖြည်းမှန်မှန်နဲ့သွားတဲ့နှုန်းလို့ ထင်ပါတယ်”

သက်တမ်း ၁၀ နှစ်ကျော်ကြာအထိ အနုပညာလောကတွင် နေရာတစ်နေရာကို ခိုင်ခိုင်မာမာရရှိထားသူမှာ သရုပ်ဆောင်နိုင်နိုင်းဖြစ်ပါသည်။ မကြာမီ ကလေးလေးယောက် ဖခင်ဖြစ်လာတော့မည့် ဖခင်တစ်ဦးလည်းဖြစ်သည်။ အနုပညာအလုပ်များကို နှစ်ရှည်ကြာ လုပ်ကိုင်ရပ်တည်နေနိုင်သူဖြစ်သလို အိမ်ထောင်ရေးတွင်လည်း အများစုအားကျရသော မိသားစုတစ်ခုကိုလည်း ပိုင်ဆိုင်ထားသူဖြစ်သည်။ အနုပညာအပေါ်ထားရှိသည့် ခံယူချက်များ၊ ဖခင်တစ်ဦး၏ခံစားမှု၊ အကယ်ဒမီရင်ခုန်သံများကို တွေ့ဆုံမေးမြန်းခဲ့ပါသည်။
မေး- အခုလက်ရှိ ဘာကားတွေရိုက်နေပါသလဲ။
ဖြေ- ဒါရိုက်တာဦးမီးပွားနဲ့ အာဆီယံသေနတ်ပစ် ရုပ်ရှင်ကားရိုက်နေပါတယ်။ အရင်ဆုံး မေမြို့မှာသွားရိုက်ပြီးသွားပြီ။ အခုက ရန်ကုန်မှာကျန်တဲ့အခန်းကို ဆက်ရိုက်တာပေါ့။ သေနတ်ပစ်သမားအဖြစ် သရုပ်ဆောင်ထားပါတယ်။
မေး- နိုင်ငံအကျိုးပြုဇာတ်ကားတွေရိုက်ကူးတဲ့အခါ ဘယ်လိုကားမျိုးတွေကို လက်ခံရိုက်ကူးလေးရှိပါလဲ။
ဖြေ- လူတွေအတွက် ပညာပေးသဘောမျိုး ဒါမှမဟုတ်ရင် နိုင်ငံတော်ကားဆိုပေမယ့်လည်း ဖျော်ဖြေရေးလေးလည်းပါရင် ပိုကောင်းတာပေ့ါ။ ကျွန်တော်က ပေါ်လစီကြီးပဲသီးသန့်ဆို မရိုက်ဘူး။
  
မေး- အကိုပါဝင်သရုပ်ဆောင်ထားတဲ့ “မော်ကင်းဥဒါန်း”ရုပ်ရှင်က အကယ်ဒမီဆန်ခါတင်ခုနစ်ကားစာရင်းမှာပါနေတော့ အကယ်ဒမီရင်ခုန်သံရှိနေပြီလား။
ဖြေ- ကျွန်တော်တော့မရှိပါဘူး။ ဒီအတိုင်းပါပဲ။ ဘာကြောင့်မှလည်း မဟုတ်ပါဘူး။
  
မေး- အကယ်ဒမီပွဲက ဒီဇင်ဘာနောက်ဆုံးပတ်မှာလုပ်မှာဆိုတော့ အစ်ကိုတို့မိသားစုတက်မှာလား။
ဖြေ- အကယ်ဒမီပွဲမှာ ကျွန်တော်မရှိဖို့များပါတယ်။ အမျိုးသမီးမီးဖွားဖို့အတွက်ရော ဒီလ ၂၉ ရက်မှာ ကလေးတွေကျောင်းထားဖို့အတွက်ရော အမေရိကားကိုပြန်မယ်။
ကျွန်တော် သုံးလလောက်ကြာမယ်။ ဖေဖော်ဝါရီလလယ်လောက်ဆို ပြန်ရောက်ပါပြီ။ သမီးကြီးနဲ့ သားလတ်ကို မူကြိုကျောင်းစထားမှာ။ သူတို့တွေ ဟိုမှာရှိတဲ့အချိန်ဆို ကျွန်တော်ကတော့ အားတဲ့အချိန် သွားလိုက်ပြန်လိုက်လုပ်နေမယ်။
မေး- မလေးရှားမှာရိုက်ခဲ့တဲ့ “မဟာဆန်တဲ့ မာယာမျက်နှာဖုံး”ဇာတ်ကားရဲ့ ဇာတ်ညွှန်းမှာ အစ်ကိုရဲ့ဘော်ဒီကြောင့် အက်ရှင်ခန်းကို ထပ်တိုးလိုက်တယ်လို့ သိရပါတယ်။ ကိုယ့်ရဲ့ဘော်ဒီကြောင့် အဲဒီလိုမျိုးဖြစ်လိမ့်မယ်လို့ မျှော်လင့်ခဲ့ဖူးလား။
ဖြေ- အက်ရှင်လေးထပ်ထည့်လိုက်တာ။ ကျွန်တော်က ဘာရယ်မဟုတ်ပါဘူး။ ကျန်းမာရေးအရ Body Beauty လောက်ပဲ ဆော့တာပါ။   
မေး- ပြည်ပဒါရိုက်တာတွေနဲ့ ရုပ်ရှင်ရိုက်ခဲ့ရတော့ ကိုယ့်အတွက် အတွေ့အကြုံဘယ်လောက်ရခဲ့လဲ။
ဖြေ- ဘယ်ဒါရိုက်တာနဲ့ပဲရိုက်ရိုက် အကုန်လုံးတော့ ဒီဘောင်ထဲမှာပဲရှိပါတယ်။ သင်တန်းမရှိဘဲနဲ့ လက်တွေ့ရိုက်ရင်းနဲ့ သင်ခဲ့တဲ့လက်တွေ့သင်တန်းကျောင်းတွေကလည်း ဒီလိုပဲ။ အဓိကကတော့ ဘယ်ဒါရိုက်တာပဲဖြစ်ဖြစ် သူတို့လိုချင်တာကို အတတ်နိုင်ဆုံးကြိုးစားပြီး လုပ်ပေးရတာပါပဲ။ တချို့ကြတော့ ပုံမှန်အနေအထားပဲကြိုက်တဲ့ ဒါရိုက်တာရှိသလို အိုဗာကြိုက်တဲ့ ဒါရိုက်တာလည်းရှိတယ်။ ဒါရိုက်တာတွေက တစ်ယောက်နဲ့တစ်ယောက်မတူကြဘူး။ သူတို့ဘာလိုချင်လဲ။ သူတို့လိုချင်တဲ့ Level ထိရောက်အောင် ကြိုးစားပြီးတော့ လုပ်ရတာပေ့ါ။ ကျန်တာက ဘာမှထွေထွေထူးထူးမရှိပါဘူး။
မေး- ရိုက်ခဲ့တဲ့ကားက စက်ပိုင်းဆိုင်ရာရော ဒါရိုက်တာပါ ပြည်ပနိုင်ငံသားတွေပေါ့။ သူတို့တွေ အလုပ်အပေါ်ထားတဲ့ ခံယူချက်တွေက မြန်မာအနုပညာရှင်တွေနဲ့ ဘယ်လိုကွာခြားမှုရှိလဲ။
ဖြေ- အနုပညာရှင်တော်တော်များများက လုပ်နေတဲ့အချိန်မှာတော့ ခံယူချက်တွေတူကြတာပဲ။ သူတို့လဲ အတူတူပါပဲ။ သူတို့လည်း အလုပ်စပြီဆိုရင် တစ်ဝက်တစ်ပျက်ဖြစ်မှာကို မလိုချင်ဘူး။ အကုန်လုံးက ပြီးချင်ကြတာပဲ။ သူတို့တွေ အဖွဲ့လိုက်ညီညီညွတ်ညွတ်နဲ့လုပ်တာ တွေ့တယ်။ ကိုယ့်အပိုင်းကို တာဝန်အပြည့်ယူထားကြတယ်။ ရှူတင်မန်နေဂျာဆို ရှူတင်မန်နေဂျာပေါ့။ သူ့အပိုင်းကို လူတွေအတွက် လစ်ဟာမှုမရှိအောင် လုပ်ပေးတယ်။ အစားဆိုအစားအသောက်၊ အပြင်မှာရိုက်မယ်ဆို နေရာထိုင်ခင်း၊ အရိပ်မရှိရင် ထီးတွေနဲ့လုပ်ပေးတယ်။ ဒါကတော့ ရှူတင်မန်နေဂျာအပိုင်းပေါ့။ အကုန်လုံးကတော့ သူ့အပိုင်းနဲ့သူ တာဝန်ကျေအောင်လုပ်ကြတယ်။
မေး- ဒီကားပြသခွင့်ရပြီဆိုရင် ပြည်ပငါးနိုင်ငံလောက်ထိ ပြသမှာဆိုတော့ ပြသမယ့်အချိန်ကျရင် မင်းသားတစ်ယောက်အနေနဲ့ နောက်ထပ်ကိုယ့်ဇာတ်ကားတွေ အင်တာနေရှင်နယ်အထိ ထိုးဖောက်ခွင့်ရလာမယ်လို့ ထင်မြင်မိလား။
ဖြေ- အခုက အစပဲရှိသေးတယ်ဆိုတော့ ပထမဆုံးကျည်တစ်တောင့်က ထိရောက်မှု ရှိ၊ မရှိတော့ မသိနိုင်ဘူး။ အရှေ့မှာလည်း ကျွန်တော့်ထက်စောတဲ့သူတွေ ဒီလိုပဲလုပ်ခဲ့ကြတာပဲ။ ဒါပေမဲ့ အကုန်လုံးက အနောက်ကနေပြီး ဆက်တိုက်ဆက်တိုက်လိုက်သွားတော့မှ လမ်းကြောင်းတစ်ခုက ပေါက်သွားမှာလေ။ အခုလမ်းကြောင်းဖောက်လိုက်၊ တော်ကြာမဖောက်လိုက်နဲ့ဆိုရင် ချုံထူပြီးတော့ လမ်းကြောင်းက ပေါက်မှာမဟုတ်တော့ဘူး။ ဒီသဘောလေးပါပဲ။ ကိုယ့်နည်းကိုယ့်ဟန်နဲ့ပဲဖြစ်ဖြစ်။ အသိုင်းအ၀ိုင်းနဲ့ပဲဖြစ်ဖြစ်၊ အဖွဲ့အစည်းတစ်ခုနဲ့ပဲဖြစ်ဖြစ် ဒါကိုအမြဲတမ်း လုပ်သင့်တယ်လို့ ကျွန်တော် ထင်ပါတယ်။
မေး- မလေးရဲ့အထပ်သားစက်ရုံမှာ မြန်မာလုပ်သားတွေနဲ့အတူတူ ဇာတ်ဝင်ခန်းတွေရိုက်ခဲ့ရတော့ သူတို့ဆီက ဘယ်လိုစကားသံတွေကြားခဲ့ရလဲ။
ဖြေ- သူတို့ခံစားချက်တွေက ဇာတ်ကားထဲမှာ ပါလာမယ့်အသံတွေနဲ့ တစ်ထပ်တည်းပဲဗျာ။ အဲဒီစက်ရုံမှာရှိတဲ့ မြန်မာတစ်ယောက်ဆိုရင်လည်း သူဌေးနဲ့ အဆင်မပြေမှုတွေရှိတယ်။ မေးကြည့်လိုက်ရင် ပြန်ချင်တာတော့သိတယ်။ ပြန်ချင်ပေမယ့်လည်း ဒီမှာက ဖောင်ဖျက်ခဲ့တဲ့သူတွေက တော်တော်များတယ်။ ပြန်လာရင် ဘာလုပ်ကြမလဲ သူတို့စဉ်းစားတယ်။ တချို့ကျတော့လည်း ရသလောက်တော့ ကုတ်ကတ်ပြီးနေလိုက်ဦးမယ်ဆိုတဲ့သူလည်းရှိတယ်။ တော်တော်များများက စားသောက်ဆိုင်မှာလုပ်တာများတယ်။ အကုန်လုံးက တစ်သံတည်းပဲ ထွက်ကြတယ်။ ဘာပဲဖြစ်ဖြစ် သူတို့က ဖြစ်နိုင်ရင်ပြန်ချင်တယ်။ ဖြစ်လိုက်ရင် ကျန်းမာရေးအရရော၊ အသက်အန္တရာယ်အရရော တော်တော်လုံခြုံမှုမရှိဘူးလို့ အကုန်ပြောကြတယ်။ဖြစ်သွားရင်လည်း ဟိုဘက်အပိုင်းက တာဝန်မယူနိုင်ဘူး။ အဲဒီလိုမျိုး အများကြီးပဲ။ ဒီနိုင်ငံမှာက တစ်ခုခုဖြစ်ရင် ရဲသွားတိုင်ရင် ဖြစ်သေးတယ်။ ဟိုမှာကျ နိုင်ငံခြားသားဖြစ်တဲ့အတွက် တာဝန်ယူမှုအပိုင်းတွေက ကွာတာပေ့ါ။
မေး- အခုဆိုရင် စတုတ္ထရင်သွေးလေးလည်းရနေပြီ။ မိသားစု စုံစုံလင်လင်နဲ့ ပျော်ရွှင်မှုရနေအောင် အစ်ကိုနဲ့ မစန္ဒီချိုတို့နှစ်ယောက် ဘယ်လိုနားလည်မှုတွေနဲ့ အိမ်ထောင်ရေးကို တည်ဆောက်နေကြလဲ။
ဖြေ- ဒီလိုပါပဲ။ တကူးတကကြီး တည်ဆောက်စရာလည်းမလိုပါဘူး။ အဓိက ကလေးတွေနဲ့ဖြစ်လာတဲ့ သံယောဇဉ်ကြိုးက တစ်ကြိုးပြီးတစ်ကြိုးပေ့ါ။ အခုကလေးက နောက်ဆုံးကြိုးလေးပါ။ နောက်ဆုံးကြိုးလေးကို ၂၀၁၄ တစ်လပိုင်းမှာမွေးမယ်။ ကိုယ့်မိသားစုလေးကို အချိန်ပေးမှုရယ်၊ တာဝန်ယူနိုင်မှုတစ်ခုရယ် အဲဒါတွေပါပဲ။
မေး- ကလေးတွေကိုလည်း ကြော်ငြာတွေပေးရိုက်ထားတာလေးတွေရှိနေတော့ အနုပညာအမွေနဲ့ပတ်သက်ပြီး ကလေးတွေအပေါ် ဘယ်လိုဖြစ်စေချင်မိလဲ။
ဖြေ- ကလေးတွေဒီမှာနေတဲ့အချိန်မှာ အမှတ်တရလည်းဖြစ်အောင်လို့ ရိုက်လိုက်တာပါ။ တကယ်တမ်းကျ ကလေးတွေက ငယ်လည်းငယ်သေးတယ်။ သိလည်းမသိသေးဘူး။ အမှတ်တရဖြစ်အောင်ရိုက်လိုက်တာ။ သူတို့သိလာတဲ့အချိန်ကျရင် သူတို့မရိုက်ချင်ဘူးဆိုရင်လည်း မရိုက်ခိုင်းပါဘူး။ သူတို့မလုပ်ချင်တဲ့အလုပ်ကို ဇွတ်အတင်းမခိုင်းပါဘူး။ အနုပညာအမွေဆိုတာလည်း ကာယကံရှင်ကလေးတွေအပေါ်မှာပဲ မူတည်ပါတယ်။ သူတို့ စိတ်နေစိတ်ထားဘယ်လိုရှိမလဲ။ ငယ်သေးတော့ မသိနိုင်သေးဘူး။ ကြီးတော့လည်း တစ်မျိုးပေ့ါ။
မေး- အခုဆို အစ်ကိုရဲ့အနုပညာသက်တမ်းက ၁၄ နှစ်လောက် ရှိနေပြီ။ အခုအချိန်ထိ အစ်ကိုက အနုပညာအလုပ်ကို ဖြည်းဖြည်းမှန်မှန်သွားနေတာ တွေ့နေရပါတယ်။ အဲလိုမျိုးသွားနေတာ ဘာကြောင့်ပါလဲ။
ဖြေ- ကျွန်တော့်ရဲ့မြန်နှုန်းက ဖြည်းဖြည်းနဲ့မှန်မှန်ပဲသွားမယ့် Speed ပဲ ထင်ပါတယ်။ ကျွန်တော်ကလည်း အဲဒါမျိုးပဲ သဘောကျပါတယ်။ အနုပညာလောကမှာ ကောက်ရိုးမီးလည်းမဖြစ်ချင်ဘူး။ တဖြည်းဖြည်းနဲ့မှ ပရိသတ်လက်ခံလာပြီး အားပေးမှုရလာအောင် ကိုယ်လုပ်ချင်တဲ့အလုပ်ကို ဘယ်အသက်အရွယ်အထိ လုပ်မလဲဆိုတာမျိုးပေ့ါ အဲဒီလိုလုပ်လို့ရတဲ့ ရှေ့ကသရုပ်ဆောင်နောင်တော်များကိုလည်း အားကျပါတယ်။ ကိုယ်လုပ်ချင်တဲ့အချိန်ထိ လုပ်လို့ရအောင် ပရိသတ်က နေရာတစ်နေရာကို ပေးထားတယ်။ ကျွန်တော်က အဲဒါမျိုးသဘောကျတယ်။ ကောက်ရိုးမီးလို ဟုန်းခနဲတောက်ပြီး ချက်ချင်းပြန်ငြိမ်သွားတာမျိုးကို ကျွန်တော်လည်းမဖြစ်ချင်ဘူး။ အဲဒီအတွက်ကို ကိုယ့်နှုန်းလေးနဲ့
အေးဆေးလေးပဲသွားတာပါ။
မေး- ဇာတ်လမ်း၊ ဇာတ်အိမ်ကောင်းတွေကို ပရိသတ်တွေမျှော်လင့်နေတဲ့ အခုလိုအချိန်မျိုးမှာ အစ်ကိုရော ဘယ်လိုအချက်တွေကြည့်ပြီး ဇာတ်ကိုလက်ခံဖြစ်ပါသလဲ။
ဖြေ- အခုနောက်ပိုင်း ပရိသတ်တွေက အသစ်အဆန်းမြင်ချင်၊ ကြည့်ချင်ကြမှာပဲ။ ကျွန်တော်တို့လုပ်လာတဲ့ ကားပေါင်းမြောက်များစွာကလည်း တစ်ခုနဲ့တစ်ခုက ဆင်တူယိုးမှားတွေ အများကြီးရှိတယ်။ နောက်ပိုင်းကျ ကျွန်တော်လည်း ပရိသတ်အတွက်ဆန်းမယ်ထင်တဲ့ ကိုယ့်အတွက်လည်း လုပ်ရတာအားရမှုရှိမယ်ဆိုရင်တော့ အဲဒီလို ဇာတ်လမ်းမျိုးတွေကို လက်ခံပါတယ်။
မေး- အစ်ကို့ရဲ့ ပရိသတ်အတွက် စကားလက်ဆောင်လေး ပြောပေးပါဦး။
ဖြေ- အခုဆိုရင် ကျွန်တော့် အနုပညာသက်တမ်း တော်တော်ကြာပါပြီ။ ၁၉၉၈/၉၉ ထဲက အခုချိန်ထိအားပေးတဲ့ ပရိသတ်တွေက နေရာတစ်နေရာပေးတဲ့အတွက် ကျေးဇူးတင်ပါတယ်လို့ ပြောချင်ပါတယ်။
ကျေးဇူးတင်ပါတယ်။