ကျော်ကျော်ဗိုနှင့်တွေ့ဆုံခြင်း

“ကျော်ကျော်ဗိုက အနုပညာသမားအဖြစ်ပဲ တောက်လျှောက်ရှိနေမယ်”

ဇွဲဥာဏ်

အတွဲ (၁၂)၊ အမှတ်(၃၇)

အဘိုးဖြစ်သူ၏ မျိုးဆက်အမွေဖြစ်သော သဘင်အနုပညာတွင်သာမက ရုပ်ရှင်အနုပညာဘက်တွင်လည်း ပရိသတ်အားပေးမှုရရှိနေသူတစ်ဦးမှာ ရွှေမန်းတင်မောင်၏ မျိုးဆက်ဖြစ်သူ ကျော်ကျော်ဗိုဖြစ်သည်။ ရင်းနှီးသူများက ကြံ့ဟုခေါ်ဆိုကြသလို သရုပ်ဆောင်အဖြစ်သာမက ပရိသတ်များအားပေးမှုရရှိသည့် နှင်းဆီအငြိမ့်အဖွဲ့တွင်လည်း လူရွင်တော်တစ်ဦးအဖြစ် ပါဝင်သူတစ်ဦးဖြစ်သည်။ ထို့အပြင် ရုပ်ရှင်လောကအတွက် အနုပညာနှင့်ပတ်သက်သည့် ကုမ္ပဏီတစ်ခုကိုလည်း ထူထောင်ထားပြီး ပရိသတ်များအတွက် အရည်အသွေးကောင်းမွန်သည့် ရုပ်ရှင်ကားများထုတ်ရန် အစီအစဉ်ရှိသည်ဟုဆိုသည့် ကျော်ကျော်ဗိုနှင့် ရှေ့ဆက်မည့်အနုပညာအကြောင်း တွေ့ဆုံမေးမြန်းခဲ့ပါသည်။
မေး- ၂၀၁၃ အထိဆို ကိုကြံ့ရဲ့ အနုပညာသက်တမ်းဘယ်လောက်ရှိပြီလဲ။
ဖြေ- အနုပညာသက်တမ်းက ဆယ်တန်းအောင်ကတည်းက စလုပ်တာဆိုတော့ကြာပြီ အတိအကျတော့ မမှတ်မိဘူး။ ဒီရုပ်ရှင်ကို ပြောတာမဟုတ်ဘူး။ အရင်က သီချင်းလည်းဆိုတယ်။ ဇာတ်လည်းလိုက်ကခဲ့တယ်။
မေး- ဇာတ်သဘင်မျိုးဆက်တစ်ယောက်ပေမယ့် ရုပ်ရှင်အနုပညာဘက်ကို လုပ်ဖြစ်တာဘာကြောင့်လဲ။
ဖြေ- ကိုကြံ့က အနုပညာသမားဖြစ်ချင်တာကိုး၊ ဆယ်တန်းအောင်တုန်းက Mr.Guiter မှာသီချင်းဆိုတယ်။ စီးရီးလုပ်ဖို့ကြိုးစားသေးတယ်။ အဲဒီမှာ ငါးနှစ်လောက်ကြာမှ ဦးချမ်းရဲ့ဇာတ်နောက်လိုက်။ အဲဒီမှာလည်း ငါးနှစ်လောက်ကြာတယ်။
ပြီးမှ ဒီရုပ်ရှင်လောကထဲ ရောက်လာတာ။ အဲဒီတော့ ကိုယ်ကအနုပညာသမားဖြစ်ချင်တာ။ ဇာတ်မင်းသားမှ ရုပ်ရှင်မင်းသားမှမဟုတ်ဘူး။ ပရိသတ်ကိုဖျော်ဖြေနေရရင် ဘာမဆိုအကုန်လုပ်ချင်တာ။ အခုလည်း အကုန်လုပ်နေတာပဲ။ လူရွင်တော်လုပ်တယ်။
မေး- ခုနောက်ပိုင်းမှာ ဇာတ်ကားရုိုက်ကူးမှုတွေများလာတော့ ပရိသတ်တွေ ငြီးငွေ့မသွားအောင် ဘယ်လိုဇာတ်မျိုးတွေ ရွေးချယ်ရိုက်ကူးဖြစ်လဲ။
ဖြေ- ဟိုတုန်းက ငြီးငွေ့တယ်ဆိုတဲ့ သဘောတရားက ကိုယ်တို့အနုပညာဖန်တီးရတဲ့ဘက်မှာ ကျော်လို့မရတဲ့စည်းတွေရှိတယ်။ ခုဆိုရင် ထိုက်သင့်သလောက် လွတ်လပ်စွာဖန်တီးခွင့်ရှိလာပြီဆိုတော့ ကိုကြံ့တို့လုပ်ချင်တာလုပ်လို့ရလာပြီ။ ပရိသတ်ကိုတင်ပြဖို့ ပုံသဏ္ဍာန်အသစ်လေးတွေ လုပ်ပိုင်ခွင့်ရလာတာက ကောင်းသောလက္ခဏာပေါ့။ ငြီးငွေ့တယ်ဆိုတာက အရေအတွက်များတာလည်းပါတာပေါ့။ မင်းသားတစ်ယောက် တစ်ပတ်ကိုတစ်ကားနှုန်း ပုံမှန်ထွက်နေတော့ အမြဲတမ်းမြင်နေရတဲ့အပေါ်မှာ ငြီးငွေ့ကောင်း ငြီးငွေ့နိုင်လိမ့်မယ်။ အရေအတွက်များတာကို လျှော့စရာမလိုပါဘူး။ အရေအတွက်များတဲ့အပေါ်မှာ အကြောင်းအရာအဖြစ်အပျက် တင်ဆက်ပုံများများလေး တွေးခေါ်ပြီး ဖန်တီးနိုင်မယ်ဆိုရင်တော့ ပရိသတ်ငြီးငွေ့စရာအကြောင်းမရှိပါဘူး။
မေး- ကိုကြံ့အနေနဲ့ ဇာတ်ရုပ်အစုံမှာ ပီပီပြင်ပြင်သရုပ်ဆောင်နိုင်တယ်လို့ ပရိသတ်တွေက သတ်မှတ်ထားပေမယ့် ရုပ်ရှင်ကားတွေမှာ ဟာသကားတွေပဲ တွေ့နေရတာ ဘာကြောင့်လဲ။
ဖြေ- ရုပ်ရှင်က ဟာသချည်းပဲရိုက်နေတာ။ ပရိုဂျုဆာတွေကလည်း ပိုက်ဆံရမယ့်ကားတွေပဲ ရိုက်ကြမှာပေ့ါ။ သူတို့ကိုလည်း အပြစ်ပြောလို့မရဘူး။ လူတစ်ယောက်က အရင်းအနှီးထုတ်ထားရင် မရှုံးရင်တောင် အရင်းတော့ပြန်လိုချင်ကြတာပဲလေ။ ပရိသတ်က ဟာသကားလက်ခံတယ်ဆိုတော့ ဟာသကားတွေပဲရိုက်ရတာပေါ့။ အမှန်က စွန့်စားမှုတစ်ခုယူပြီး ထိုးဖောက်မယ့် ဇာတ်ကားတွေလည်း ရှိသင့်ပါတယ်။
မေး- မကြာခင်ကရိုက်ခဲ့တဲ့ “အိန်ဂျယ်” ဇာတ်ကားကိုရော အကိုတို့ထုတ်လုပ်ရေးအနေနဲ့ လုပ်ခဲ့တာလား။
ဖြေ- ထုတ်လုပ်ရေးအနေနဲ့တော့ မဟုတ်ပါဘူး။ ပူးပေါင်းဆောင်ရွက်တဲ့အနေနဲ့လုပ်ခဲ့တာပါ။ ဇာတ်ကားတစ်ခုလုံးထုတ်ဖို့ကတော့ ရုပ်ရှင်ဇာတ်ကားအနေနဲ့ လုပ်ဖြစ်မှာပါ။ “အိန်ဂျယ်”ဇာတ်ကားကတော့ ပရိသတ်တွေကို သမားရိုးကျဇာတ်ကားတွေကနေ ခွဲထွက်ပြီး ဖန်တီးပေးချင်တဲ့ ဇာတ်လမ်းလေးပါ။ စိတ်ကူးယဉ်ဇာတ်လမ်းလို့လည်း ပြောလို့ရတယ်။ အကြောင်းအရာဆန်းဆန်း ဇာတ်လမ်းလေးပါ။
မေး- ACE Digital Warehouse Production ကို လုပ်ဖြစ်ခဲ့တာကရော ဘာကြောင့်လုပ်ဖြစ်ခဲ့တာလဲ။ ဘယ်လိုလုပ်ငန်းတွေလုပ်နေလဲ။
ဖြေ- အဓိကကတော့ အနုပညာလုပ်ငန်းတွေကို သေသေချာချာလုပ်ချင်တယ်။ အဲဒါကြောင့် ACE ကုမ္ပဏီက မိတ်ဆွေတွေနဲ့ သူငယ်ချင်းတွေပေါင်းပြီး အနုပညာလောကအတွက် အုတ်တစ်ချပ်၊ သဲတစ်ပွင့်အနေနဲ့ ထူထောင်ဖြစ်တာပါ။ ဒီမှာက အနုပညာနဲ့ပတ်သက်တဲ့ စီးပွားရေးပဲလုပ်တယ်။ ကျန်တဲ့စီးပွားရေးတွေမပါဘူး။ တကယ့်ဒစ်ဂျစ်တယ် ရုပ်ရှင်ကင်မရာကြီးတွေ ငှားပေးတယ်။ ရုပ်ရှင်ရိုက်ဖို့ အစီအစဉ်ဆွဲပေးတယ်။ ရုပ်ရှင်လောကအတွက် ကိုယ်လည်းကိုယ်တတ်နိုင်တဲ့ဘက်က ၀င်ပြီးလုပ်ပေးဖြစ်တာပါ။
မေး- နှင်းဆီအဖွဲ့သားတွေအနေနဲ့ အရင်ကဆိုရင် အမြဲတမ်းလိုလိုတွဲပြီးတွေ့ရတယ်။ အခုနောက်ပိုင်းမှာ အဲဒီလိုမျိုးတွေ့ရတာ နည်းသွားတာကရော ဘာကြောင့်ပါလဲ။
ဖြေ- ကိုယ်တို့က တကယ့်အငြိမ့်ကနေတဲ့ ပရော်ဖက်ရှင်နယ်တွေမှ မဟုတ်တာ။ အားလုံးအကြောင်းအရာတိုက်ဆိုင်တဲ့အချိန်၊ ပင်မလုပ်ငန်းလေးတွေအားတဲ့အချိန်မှသာ ကဖြစ်တော့ နှေးသွားတာ မနှေးသွားတာတော့မရှိပါဘူး။ ကိုကြံ့တို့တွဲတယ်ဆိုတာက အနုပညာလုပ်ငန်းအရတွဲတာရှိသလို အပြင်မှာသူငယ်ချင်းတွေအနေနဲ့လည်း တွဲဖြစ်တာရှိတယ်။
မေး- ထုတ်လုပ်ရေးလည်းလုပ်ဖြစ်တယ်ဆိုတော့ ကိုကြံ့အတွက် အနုပညာမှတ်တိုင်ဖြစ်နိုင်မယ့် ဇာတ်ကားရိုက်ဖို့ရှိလား။ ဦးလေးဖြစ်တဲ့ ဦးချမ်းသာရဲ့ဇာတ်လမ်းတွေကလည်း ကောင်းတာတွေများတယ်လေ။
ဖြေ- ဦးချမ်းဇာတ်တွေကို ကိုကြံ့ ဗီဒီယိုမင်းသားဖြစ်ကတည်းက ရိုက်ခဲ့တာပဲ။ ရုပ်ရှင်ကားကြီးအနေနဲ့ ဖန်တီးဖို့ရှိပါတယ်။ ဦးချမ်းဇာတ်တွေ ယူထားတာလည်းရှိပါတယ်။ လောလောဆယ်တော့ အကုန်လုံးတိုင်ပင်နေတယ်။ ဖုတ်ပူမီးတိုက်နဲ့ ၀တ္ထုတစ်အုပ်ကောက်ဝယ် ချက်ချင်းဇာတ်ညွှန်းရေးပြီးတော့ မရိုက်ချင်ဘူး။ ရုပ်ရှင်တစ်ကားလုံးမှာ ပါဝင်ပတ်သက်တဲ့ မီးထိုးမှန်ထိုးကအစ သူ့ကဏ္ဍနဲ့သူ ပြည့်စုံမှလုပ်ချင်တယ်။
မေး- ဦးချမ်းသာတို့လက်ထက်မှာ ရွှေမန်းတင်မောင်သဘင်သက် နှစ် (၈၀)ပြည့် အမှတ်တရပွဲကို အောင်မြင်အောင်လုပ်နိုင်ခဲ့တော့ ကိုကြံ့တို့လက်ထက်မှာရော ဇာတ်သဘင်အတွက် ဘာတွေလုပ်ဖို့ရှိလဲ။
ဖြေ- အဘိုးအတွက် လုပ်ပေးပြီးပြီ။ ကိုကြံ့တို့ မြေးတစ်ယောက်အနေနဲ့တော့ အတိုင်းအတာတစ်ခုအထိတော့ အောင်မြင်ပြီလို့ထင်ပါတယ်။ ဒါပေမဲ့ သဘင်အတွက်လည်း အများကြီးလုပ်ပေးဖို့ရှိပါသေးတယ်။ အခွင့်အခါသင့်တိုင်းလည်း လုပ်ဖြစ်ပါတယ်။
မေး- ကိုကြံ့ရဲ့လှုပ်ရှားမှုတွေကို ဖေ့စ်ဘွတ်ခ်မှာ အမြဲတန်း update တွေ့ရတော့ ဖေ့စ်ဘွတ်ခ်ကို တစ်နေ့ဘယ်လောက်အချိန်အထိ သုံးဖြစ်လဲ။
ဖြေ- ဖေ့စ်ဘွတ်ခ်ကတော့ ရူတင်ပြီးတဲ့အချိန်သုံးဖြစ်တယ်။ တစ်ခါတလေ ရှုတင်မှာပဲ တယ်လီဖုန်းနဲ့ ပရိသတ်တွေ ကိုယ်ဘာလုပ်နေတယ်ဆိုတာကို သိစေချင်လို့ တင်ပေးဖြစ်တယ်။ ဖေ့စ်ဘွတ်ခ်က ပရိသတ်နဲ့ကိုယ့်အတွက် ဆက်သွယ်မှုတစ်ခုပါပဲ။
မေး- ဖေ့စ်ဘွတ်ခ်မှာ ပရိသတ်တွေပြန်ရေးပေးတဲ့ ဝေဖန်ထားတဲ့မှတ်ချက်တွေကိုရော ဖတ်ဖြစ်လား။
ဖြေ- အဲဒါတွေကိုတော့ အမြဲတမ်း ဂရုတစိုက်ဖတ်ဖြစ်ပါတယ်။ ကိုယ် post တစ်ခုတင်တိုင်းတင်တိုင်း ပရိသတ်တွေရဲ့ comment တွေ reply တွေကို အမြဲတမ်းဖတ်ပါတယ်။ ပရိသတ်တွေရဲ့အမြင်က တစ်ယောက်နဲ့တစ်ယောက် မတူဘူးလေ။ လူတိုင်းက ကိုယ့်ကိုယ်ကိုယ် ကောင်းတယ်ထင်တော့ ကိုယ်မဟုတ်တဲ့ တစ်ခြားလူရဲ့အမြင်ကိုလည်း ကိုကြံ့တို့ လက်ခံရမယ်။
မေး- ကိုကြံ့သမီးလေးရဲ့ပုံတွေကို ပရိသတ်တွေက ချစ်ဖို့ကောင်းတယ်လို့ ပြောကြတယ်။ သမီးလေးကရော အခုအချိန်ကတည်းက အနုပညာကို စိတ်ဝင်စားတာမျိုးရှိလား။
ဖြေ- သမီးလေးကို အဓိကကတော့ အဖေ၊ အဘိုး၊ ဘကြီးတွေရဲ့အရှိန်နဲ့ ပင်ကိုယ်ကလည်း ချစ်စရာကောင်းတော့ ပရိသတ်တွေက ချစ်ကြတယ်။ ကိုယ်ချစ်တဲ့ အနုပညာသမားတစ်ယောက်တင်မဟုတ်ဘဲ သူ့ရဲ့သားစဉ်မြေးဆက်အထိ မေတ္တာထားတဲ့ ပရိသတ်တွေကို ကျေးဇူးတင်ပါတယ်။ အနုပညာသမားမိဘက မွေးလာတာဆိုတော့ အနုပညာကို ၁၀၀ ရာခိုင်နှုန်း စိတ်ဝင်စားတယ်။
မေး- ကိုကြံ့ရဲ့ပရိသတ်တွေအတွက် စကားတစ်ခွန်းလောက်ပြောပေးပါ။
ဖြေ- ကျော်ကျော်ဗိုက အနုပညာသမားအဖြစ်ပဲ ရပ်တည်ချင်တာပါ။ အနုပညာသမားအဖြစ်ပဲ တောက်လျှောက်ရှိနေမှာပါ။
ကျေးဇူးတင်ပါတယ်။